പട്ടികജാതി വിഭാഗം വിദ്യാർത്ഥികൾക്ക് ഹെൽത്ത് കാർഡ്

മോഡൽ റസിഡൻഷ്യൽ സ്കൂളുകളിലെയും പ്രീ മെട്രിക് ഹോസ്റ്റലുകളിലെയും വിദ്യാർത്ഥികളുടെ സമ്പൂർണ്ണാരോഗ്യം ലക്ഷ്യമാക്കിയാണ് ഹെൽത്ത് കാർഡ് തയ്യാറാക്കിയത്. ആരോഗ്യ വകുപ്പിൻ്റെ സഹകരണത്തോടെ എല്ലാ വിദ്യാർത്ഥികളെയും പ്രാഥമിക പരിശോധനകൾക്ക് വിധേയരാക്കി പരിശോധനാ വിവരങ്ങൾ ഹെൽത്ത് കാർഡിൽ രേഖപ്പെടുത്തും. തുടർന്ന് മൂന്നു മാസം കൂടുമ്പോൾ തുടർ പരിശോധനകൾ നടത്തി ആവശ്യമായ നടപടികൾ സ്വീകരിക്കും.
അഞ്ചാം ക്ലാസിൽ ചേരുന്ന കുട്ടിയുടെ വിവരങ്ങൾ 12-ാം ക്ലാസുവരെ എട്ടുവർഷം കാർഡിൽ ഉൾപ്പെടുത്തും. ഡിജിറ്റൽ ഡേറ്റാ ബേസിൽ വിവരങ്ങൾ ഉൾപ്പെടുത്തുന്നതിനാൽ വിദ്യാർത്ഥികളുടെ പൊതു ആരോഗ്യസ്ഥിതി ആരോഗ്യ വകുപ്പിന് പരിശോധിക്കാനും തുടർ നടപടികൾ സ്വീകരിക്കാനും കഴിയും.

10 എം ആർ എസുകളിലായി 2043 കുട്ടികളും 84 പ്രീ മെട്രിക് ഹോസ്റ്റലുകളിലെ 2130 കുട്ടികളും ഉൾപ്പെടെ 4173 കുട്ടികൾക്കാണ് ഹെൽത്ത് കാർഡ് നൽകുന്നത്. വിദ്യാഭ്യാസ സ്ഥാപനം സ്ഥിതിചെയ്യുന്ന മേഖലയിലെ പ്രാഥമികാരോഗ്യ കേന്ദ്രത്തിലെ ഡോക്ടർക്കും പട്ടികജാതി വികസന വകുപ്പ് ജില്ലാ ഓഫീസർമാർക്കുമാണ് പദ്ധതിയുടെ മേൽനേട്ട ചുമതല. പോഷകാഹാര ന്യൂനതകൾ, പൊതു ആരോഗ്യനില , വിളർച്ച, മറ്റു രോഗ സാധ്യതകൾ, സ്വഭാവ- പഠന വൈകല്യം, ശുചിത്വ കാര്യങ്ങൾ തുടങ്ങിയവ ക്രമമായി നിരീക്ഷിക്കും.